السلام وعليكم

اكتب وانا احس بشعور غريب مو فاهمه ، ضايعه منقهره .. اصعب شعور ان تُنتزع منك (هويتك) ، مو بس ورقة أو جنسية… لا، يعني فجأة تصير غريب بديرتك وتصير جنك غلطة تمشي على الأرض والكل مايبيك ، أنا ما ارتكبت ذنب، لا أنا، ولا أبوي، ولا اخواني، لكن تحملنا نتيجة غلطة جد والدي 

طردونا من وظايفنا، طلبو من عمامي يسلمون البدله و هوياتهم العسكريه ، ناس أفنوا عمرهم في خدمة هالبلد، فجأة صاروا برا :( انفصلنا، تهجرنا، فرقونا عن بعض ،فرقو ام عن عيالها… حتى عمي، انولد له حفيد وما شافه، لأن بدوله ثانيه حياتنا انقلبت فوق حدر ، ايامنا صارت سوده

شعور ما اتمناه لعدوي وفوق الألم، شماته من كل صوب ناس قريبه ، اصدقاء ، زملاء عمل ، جنها اهي غلطتنا صج 

أكثر شي عورني؟ غير القرار…لما طلعت من سهل شهادة جنسيه طلعلي : “غير كويتي”. بعد 20 سنه اصير فجأه بدون أنا اللي كنت أغني للنشيد واستشعر كلمه كلمه فيه، وأفتخر بكل سفره ان ديرتي الكويت واقول الله يعزها والحمدلله عليها، واليوم يقولون لي مو كويتية؟ هذا الشي عورني تعبني نفسيا ذبحني 

أي ورقة تغير كل هالحب والانتماء؟ أنا مو كويتية بالأوراق؟ صعب اتقبل رغم اني ادري اني أنا كويتية بالهوية، بالروح، بالولاء، بالعشره، بالحب اللي ما يتغير حتى لو تغيرت جنسيتي. أنا محتره منهاارره مقهوره، وقهري ما له حد انا مظلومه مثل ناس وايد غيري احب الكويت حتى لو اهي ماتحبني والله.